ತಂದೆ ವಿಷ ಕೊಟ್ಟರೂ ದಿವ್ಯಾ ಸುರೇಶ್ ಬದುಕಿ ಬಂದಿದ್ದು ಹೇಗೆ …?

ಬಿಗ್ ಬಾಸ್ ಮನೆ ಇದೀಗ ರಂಗೇರುತ್ತಿದೆ. ಒಂದೇ ತಟ್ಟೆಯಲ್ಲಿ ಉಣ್ಣುತ್ತಿದ್ದ ಮಂದಿ ಈಗ ಪರಸ್ಪರ ಸ್ಪರ್ಧೆ ಶುರುವಿಟ್ಟುಕೊಂಡಿದ್ದಾರೆ.

ಮಾವ ಅಳಿಯನದ್ದು ಬಿಡಿಸಲಾರದ ಸಂಬಂಧ ಅಂದುಕೊಂಡ್ರೆ ತೊಡೆ ತಟ್ಟಿ ತೋಳು ಏರಿಸುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಈ ನಡುವೆ ಒಂದಿಷ್ಟು ಹಾಸ್ಯ, ಒಂದಿಷ್ಟು ಕಣ್ಣೀರುಗಳ ಮೂಲಕ ನಿದ್ದೆಗೆ ಜಾರುವ ವೀಕ್ಷಕರನ್ನು ಹಿಡಿದಿಡುವ ಪ್ರಯತ್ನಕ್ಕೆ ವಾಹಿನಿ ಮುಂದಾಗಿದೆ.

ಅದರಲ್ಲೊಂದು ಪ್ರಯತ್ನ ಗುಟ್ಟೊಂದು ಹೇಳುವ ಟಾಸ್ಕ್. ಈ ಟಾಸ್ಕ್ ನಲ್ಲಿ ಚಂದ್ರಕಲಾ ಅವರ ತಂದೆಯಿಂದಲೇ ಆದ ಕಿರುಕುಳವನ್ನು ಹೇಳಿಕೊಂಡರೆ, ವೈಷ್ಣವಿ ತಮ್ಮ ಪ್ರೇಮ ವೈಫಲ್ಯದ ಕಥೆ ಹೇಳಿದ್ದಾರೆ. ಮಂಜ ಕೋಳಿ ಕದ್ದ ಹೇಳಿದ್ರೆ, ದಿವ್ಯ ಸುರೇಶ್ ಕಥೆ ಮಾತ್ರ ಕಲ್ಲು ಹೃದಯವನ್ನೂ ಕರಗಿಸುವಂತಿತ್ತು.

ನಾನ್ಯಾಕೆ ಇವತ್ತು ಇಷ್ಟೊಂದು ಸ್ಟ್ರಾಂಗ್ ಅನ್ನುವ ರಹಸ್ಯ ಬಿಡಿಸಲು ನಿಂತ ದಿವ್ಯಾ, ತಂದೆ ತಮ್ಮ ಪಾಲಿಗೆ ಕೊಲೆಗಾರನಾದ ಕಣ್ಣೀರ ಕಥೆಯನ್ನು ಬಿಡಿಸಿಟ್ಟಿದ್ದಾರೆ.

ಅದು ದಿವ್ಯಾ ಎರಡನೇ ತರಗತಿಯಲ್ಲಿದ್ದ ಸಂದರ್ಭ. ಆಗ್ಲೇ ತಂದೆ ಕುಡಿತದ ಚಟವನ್ನು ಅಂಟಿಸಿಕೊಂಡಿದ್ದರು. ಇದರಿಂದ ತಾಯಿ ಪಡಬಾರದ ಕಷ್ಟ ಪಡುತ್ತಿದ್ದರು. ಮನೆ ನಿಭಾಯಿಸೋದು, ಮಕ್ಕಳ ಶಾಲೆಯ ಖರ್ಚು ಎಲ್ಲದಕ್ಕೂ ಹೇಗೋ ದುಡಿದು ಹಣ ಸಂಪಾದಿಸುತ್ತಿದ್ದರು.

ಅದೊಂದು ದಿನ ದಿವ್ಯಾ ತಂದೆಗೆ ಏನಾಗಿತ್ತೋ ಗೊತ್ತಿಲ್ಲ. ಅಷ್ಟು ದಿನಗಳ ಕಾಲ ಮಕ್ಕಳಿಗೆ ತಟ್ಟೆಯಲ್ಲಿ ಊಟ ಹಾಕಿ ಕೊಟ್ಟವರಲ್ಲ. ಅದೊಂದು ದಿನ ಮನೆಗೆ ಬಂದವರೇ ಅಡುಗೆ ಮನೆಗೆ ಹೋಗಿ, ತಟ್ಟೆಗೆ ಊಟ ಹಾಕಿ ಕಲಸಿ ದಿವ್ಯಾ ಹಾಗೂ ಅವರ ಅಣ್ಣನ ಕೈಗೆ ಕೊಟ್ಟಿದ್ದಾರೆ. ಜೊತೆಗೆ ತಾವೊಂದು ತಟ್ಟೆಯಲ್ಲಿ ಊಟ ಮಾಡಲಾರಂಭಿಸಿದ್ದಾರೆ.

ಒಂದೆರೆಡು ತುತ್ತು ಒಳಗೆ ಹೋಗಿರಬೇಕು ಮೂವರು ವಾಂತಿ ಮಾಡಲಾರಂಭಿಸಿದ್ದಾರೆ. ಆಗ ತಂದೆ ಊಟಕ್ಕೆ ವಿಷ ಹಾಕಿದ ವಿಷಯ ಹೇಳಿದ್ದಾರೆ.ಅಮ್ಮ ಮನೆಯಲ್ಲಿ ಇಲ್ಲದ ಸಂದರ್ಭದಲ್ಲಿ ಅಕ್ಕ ಪಕ್ಕದ ಮನೆಯವರು ಸಹಾಯಕ್ಕೆ ಬಾರದೇ ಇರುತ್ತಿದ್ರೆ ಮೂವರು ಬದುಕುಳಿಯುತ್ತಿರಲಿಲ್ಲ.

ನೆರೆ ಮನೆಯವರು ಆಸ್ಪತ್ರೆ ದಾಖಲಿಸಿದ ಕಾರಣ ಮೂವರು ಬದುಕಿ ಬಂದೆವು ಎಂದು ಮಾತು ಮುಗಿಸಿದ ದಿವ್ಯಾ ಬಿಕ್ಕಿ ಬಿಕ್ಕಿ ಅತ್ತಿದ್ದಾರೆ. ಆದರೆ ಅವತ್ತು ತಂದೆ ಹಾಗ್ಯಾಕೆ ಮಾಡಿದರು ಅನ್ನುವ ಪ್ರಶ್ನೆಗೆ ದಿವ್ಯಾ ಬಳಿ ಇನ್ನೂ ಉತ್ತರವಿಲ್ಲ.