ಸೋತರೂ ಭಾರತೀಯರ ಹೃದಯ ಗೆದ್ದ ಮಹಿಳಾ ಹಾಕಿ ತಂಡ

ಕಂಚಿನ ಪದಕದ ನಿರೀಕ್ಷೆ ಮೂಡಿಸಿದ್ದ ಭಾರತದ ಮಹಿಳಾ ಹಾಕಿ ತಂಡ ಗ್ರೇಟ್ ಬ್ರಿಟನ್ ವಿರುದ್ಧ ವಿರೋಚಿತ ಸೋಲು ಕಂಡಿದೆ. ಗೆಲುವಿಗಾಗಿ ತೀವ್ರ ಸೆಣಸಾಟ ನಡೆಸಿದ ಭಾರತೀಯ ಆಟಗಾರರು ಗ್ರೇಟ್ ಬ್ರಿಟನ್ ತಂಡದ ಉಸಿರುಗಟ್ಟಿಸಿದ್ದರು. ಅದ್ಭುತ ಪ್ರಯತ್ನದ ನಡುವೆಯೂ ಬ್ಯಾಡ್ ಲಕ್ ಅನ್ನುವಂತೆ ವಿಜಯಲಕ್ಷ್ಮಿ ಒಲಿಯಲಿಲ್ಲ.ಶುಕ್ರವಾರ ಬೆಳಗ್ಗೆ ಮುಕ್ತಾಯವಾದ ಪಂದ್ಯದಲ್ಲಿ ಭಾರತ ತಂಡ ಗ್ರೇಟ್ ಬ್ರಿಟನ್ ವಿರುದ್ಧ 1 ಗೋಲುಗಳ ಅಂತರದಲ್ಲಿ ಸೋಲು ಕಂಡಿದೆ.

ಚೊಚ್ಚಲ ಪದಕ ಗೆಲ್ಲುವಲ್ಲಿ ತಂಡ ವಿಫಲವಾದರೂ ರಾಣಿ ರಾಂಪಾಲ್ ಪಡೆಯ ಆಟ ಭಾರತೀಯರ ಹೃದಯ ಗೆದ್ದಿದೆ. ಮೊದಲ ಕ್ವಾರ್ಟರ್ ನಲ್ಲಿ ಪೆನಾಲ್ಟಿ ಕಾರ್ನರ್ ಮೂಲಕ ಗೋಲು ಬಾರಿಸುವ ಅವಕಾಶ ಗ್ರೇಟ್ ಬ್ರಿಟನ್ ಗೆ ಸಿಕ್ಕಿತ್ತು. ಆದರೆ ಭಾರತೀಯ ಗೋಲ್ ಕೀಪರ್ ಸವಿತಾ ಪೂನಿಯಾ ಅದನ್ನು ವಿಫಲಗೊಳಿಸಿದರು, ಎರಡನೇ ಸಲ ಸಿಕ್ಕ ಅವಕಾಶವನ್ನು ಬ್ರಿಟನ್ ಗೋಲಾಗಿ ಪರಿವರ್ತಿಸಲಿಲ್ಲ. ಮೂರನೇ ಸಲವೂ ಪೆನಾಲ್ಟಿ ಕಾರ್ನರ್ ಸಿಕ್ಕರೂ ಭಾರತೀಯ ತಂಡದ ರಕ್ಷಣಾತ್ಮಕ ಆಟದ ಕಾರಣ ಬ್ರಿಟನ್ ಗೆ ಗೋಲು ಬಾರಿಸುವ ಅವಕಾಶವೇ ಸಿಗಲಿಲ್ಲ. ಹೀಗಾಗಿ ಯಾವುದೇ  ಗೋಲು ಇಲ್ಲದೆ ಮೊದಲ ಕ್ವಾರ್ಟರ್ ಮುಕ್ತಾಯವಾಯ್ತು.

ಎರಡನೇ ಕ್ವಾರ್ಟರ್ ಆರಂಭದಲ್ಲಿ ಭಾರತೀಯ ಆಟಗಾರ್ತಿ ಗ್ರೇಸ್ ಎಕ್ಕಾ ಮಾಡಿದ ಎಡವಟ್ಟು ಬ್ರಿಟನ್ ಗೆ ಒಂದು ಗೋಲು ತಂದುಕೊಟ್ಟಿತು. ಬಳಿಕ ಬ್ರಿಟನ್ ಪೆನಾಲ್ಟಿ ಕಾರ್ನರ್ ಅವಕಾಶ ಪಡೆಯಿತಾದರೂ, ಗೋಲು ಬಾರಿಸಲು ಭಾರತೀಯ  ಗೋಲು ಕೀಪರ್ ಅದನ್ನು ತಡೆದರು.

ಪಂದ್ಯದ 19ನೇ ನಿಮಿಷಯದಲ್ಲಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಅವಕಾಶ ಸಿಕ್ಕಿತು. ಆದರೆ ಅದನ್ನು ಬಳಸಿಕೊಳ್ಳಲು ನಮ್ಮವರು ಸಫಲರಾಗಲಿಲ್ಲ. ಇದಾದ ಬಳಿಕ ಬ್ರಿಟನ್ ನ ಸಾರಾ ರಾಬರ್ಟ್ ಸನ್ ಗೋಲು ಬಾರಿಸಿ 2-0 ಮುನ್ನಡೆ ಪಡೆದರು.

ಈ ವೇಳೆ ಎಚ್ಚೆತ್ತುಕೊಂಡ ಭಾರತೀಯ ಆಟಗಾರರು ಮತ್ತಷ್ಟು ಅಕ್ರಮಣಕಾರಿ ಆಟಕ್ಕೆ ಮುಂದಾದರು. ಹೀಗಾಗಿ ಪೆನಾಲ್ಟಿ ಯಲ್ಲಿ ಗೋಲು ಬಾರಿಸಿ ಖಾತೆ ತೆರೆದರು. ಇದಾದ ಬಳಿಕ ಗುರ್ಜಿತ್ ಕೌರ್ ಪೆನಾಲ್ಟಿ ಕಾರ್ನರ್ ನಲ್ಲಿ ಸಿಕ್ಕ ಅವಕಾಶವನ್ನು ಗೋಲಾಗಿ ವರಿವರ್ತಿಸಿ 2-2 ಅಂಕಗಳೊಂದಿಗೆ ಸಮಬಲಕ್ಕೆ ಮುಂದಾದರು.  ಬಳಿಕ ಭಾರತದ ವಂದನಾ ಕಟಾರಿಯಾ ಮತ್ತೊಂದು ಗೋಲು ಸಂಪಾದಿಸಿ ಭಾರತಕ್ಕೆ 3-2ರ ಮುನ್ನಡೆ ತಂದುಕೊಟ್ಟರು.

ಮೂರನೇ ಕ್ವಾರ್ಟರ್ ನಲ್ಲಿ ಬ್ರಿಟನ್ ನಾಯಕಿ ಹೋಲಿ ಗೋಲು ಬಾರಿಸಿ 3-3 ಸಮಬಲಕ್ಕೆ ತಂಡವನ್ನು ತಂದು ನಿಲ್ಲಿಸಿದರು. ಮೂರನೇ ಕ್ವಾರ್ಟರ್ ನಲ್ಲಿ ಸಿಕ್ಕ ಪೆನಾಲ್ಟಿ ಕಾರ್ನರ್ ಭಾರತಕ್ಕೆ ಗೋಲು ತಂದುಕೊಡಲಿಲ್ಲ. ನಾಲ್ಕನೇ ಕ್ವಾರ್ಟರ್ ನ ಆರಂಭದಲ್ಲಿ ಬ್ರಿಟನ್ ಪೆನಾಲ್ಟಿ ಕಾರ್ನರ್ ನ ಲಾಭ ಬಳಸಿಕೊಂಡಿತು. ಹೀಗಾಗಿ 4-3 ಅಂತರದೊಂದಿಗೆ ಭಾರತ ಶರಣಾಯ್ತು.

ಇನ್ನು  ಟೋಕಿಯೊ ಒಲಿಂಪಿಕ್ಸ್ ನಲ್ಲಿ ಭಾರತದ ಮಹಿಳಾ ಹಾಕಿ ತಂಡದ ಶ್ರಮಕ್ಕೆ ಪ್ರಧಾನಿ ಅಭಿನಂದನೆ ಸಲ್ಲಿಸಿದ್ದಾರೆ. ತಂಡದ ಸಾಧನೆ ಹೆಮ್ಮೆ ತಂದಿದೆ. ನಮ್ಮ ಮಹಿಳಾ ಹಾಕಿ ತಂಡದ ಸಾಧನೆಯನ್ನು ನಾವು ಎಂದೆಂದಿಗೂ ನೆನಪಿನಲ್ಲಿ ಇಡುತ್ತೇವೆ. ಸ್ವಲ್ಪದರಲ್ಲಿ ನಮಗೆ ಕಂಚಿನ ಪದಕ ಕೈತಪ್ಪಿ ಹೋಗಿದೆ. ಆದರೆ ಈ ತಂಡದ ಪರಿಶ್ರಮ, ಸಾಧನೆ ನವ ಭಾರತದ ಉತ್ಸಾಹವನ್ನು ಪ್ರತಿಫಲಿಸುತ್ತದೆ ಅಂದಿದ್ದಾರೆ.