ನೌಕಾಪಡೆ ಅಧಿಕಾರಿ ಪಾತ್ರದಲ್ಲಿ ಜೋಡೆತ್ತುಗಳು…!

ರಾಕಿಂಗ್ ಸ್ಟಾರ್ ಯಶ್ ಕೆಜಿಎಫ್ 2 ಮುಕ್ತಾಯದ ಬೆನ್ನಲ್ಲೆ ಮತ್ತೊಂದು ಪ್ಯಾನ್ ಇಂಡಿಯಾ ಸಿನಿಮಾ ಕೈಗೆತ್ತಿಕೊಳ್ಳುವುದು ಪಕ್ಕಾ ಆಗಿದೆ.

ಮಫ್ತಿ ಖ್ಯಾತಿಯ ನರ್ತನ್ ಜೊತೆ ಯಶ್ ಮುಂದಿನ ಸಿನಿಮಾ ಮಾಡಲಿದ್ದು ಲಾಕ್ ಡೌನ್ ನಡುವೆಯೇ ಮುಂದಿನ ಸಿನಿಮಾಗೆ ಭರ್ಜರಿ ಸಿದ್ದತೆಗಳು ನಡೆಯುತ್ತಿದೆ. ಹಿಂದೊಮ್ಮೆ ಯಶ್‌ಗಾಗಿ ನಾನು ಕಥೆ ಮಾಡುತ್ತಿದ್ದೇನೆ ಎಂದು ನರ್ತನ್ ಹೇಳಿಕೊಂಡಿದ್ದರು. ಈಗ ಅದು ಸತ್ಯವಾಗುತ್ತಿದೆ.

ಈ ಸಿನಿಮಾದಲ್ಲಿ ಯಶ್  ನೇವಿ ಆಫೀಸರ್ ಪಾತ್ರಕ್ಕೆ ಜೀವ ತುಂಬಲಿದ್ದಾರೆ. ಈ ನೇವಿ ಆಫೀಸರ್ ಖಡಕ್ಕ್ ಅಧಿಕಾರಿಯಾಗಿದ್ದು ಬಹಳ ಕೋಪಿಷ್ಠ. ಹೀಗಾಗಿ ಉನ್ನತ ಹುದ್ದೆಯ ಅಧಿಕಾರಿ ಕೋಪಿಷ್ಠನಾಗಿದ್ರೆ ಹೇಗಿರುತ್ತದೆ ಅನ್ನುವುದರ ಸುತ್ತ ಕಥೆ ಹೆಣೆಯಲಾಗಿದೆಯಂತೆ.

ಈ ನಡುವೆ ದರ್ಶನ್ ಕೂಡಾ ನೇವಿ ಆಫೀಸರ್ ಪಾತ್ರಕ್ಕೆ ಬಣ್ಣ ಹಚ್ಚಲಿದ್ದಾರೆ ಅನ್ನುವ ಸುದ್ದಿ ಬಂದಿದೆ. ಕೊರೋನಾ ಕಾರಣದಿಂದ ಗಂಡುಗಲಿ ಮದಕರಿ ನಾಯಕ ಸಿನಿಮಾ ಶೂಟಿಂಗ್ ಸಾಧ್ಯವಿಲ್ಲ. ಈ ಸಿನಿಮಾ ಹೊರಾಂಗಣದಲ್ಲೇ ಚಿತ್ರೀಕರಣವಾಗಬೇಕಾಗಿರುವ ಕಾರಣ ಈ ಪ್ರಾಜೆಕ್ಟ್ ಮುಂದೂಡಿಕೆಯಾಗಿದೆ.  ಹೀಗಾಗಿ ಅದಕ್ಕೂ ಮುಂಚೆ ರಾಕ್ ಲೈನ್ ಜೊತೆ ಮತ್ತೊಂದು ಸಿನಿಮಾ ಪ್ರಾರಂಭಿಸಲು ದರ್ಶನ್ ನಿರ್ಧರಿಸಿದ್ದಾರೆ. ಅದಕ್ಕೆ ಗೋಲ್ಡ್ ರಿಂಗ್ ಅನ್ನುವ ಟೈಟಲ್ ಕೂಡಾ ಪಕ್ಕಾ ಆಗಿದೆ.