ಅಷ್ಟಮಠಗಳಲ್ಲೊಂದಾದ ಪುತ್ತಿಗೆ ಮಠದ 31ನೇ ಯತಿ ಸ್ವೀಕಾರ ಕಾರ್ಯಕ್ರಮ ಉಡುಪಿ ಹಿರಿಯಡ್ಕ ಸಮೀಪದ ಪುತ್ತಿಗೆ ಮಠದಲ್ಲಿ ಸೋಮವಾರ ನಡೆಯಿತು. ಪುತ್ತಿಗೆ ಮಠಾಧೀಶ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದರು ಶಿಷ್ಯನಿಗೆ ಶ್ರೀ ಸುಶ್ರೀಂದ್ರ ತೀರ್ಥ ಸ್ವಾಮೀಜಿ ಎಂದು ನಾಮಕರಣ ಮಾಡಿದರು.
ಹಾಗಾದರೆ ಸ್ವಾಮೀಜಿ ಸ್ವೀಕಾರ ಕಾರ್ಯ ಹೇಗೆ ನಡೆಯಿತು, ಅದರ ಹಿಂದಿದೆ ಅದ್ಭುತ ಕಥೆ.
ಮಠದ ಉತ್ತರಾಧಿಕಾರಿಯಾಗಿ 29 ವರ್ಷದ ಸುಶ್ರೀಂದ್ರ ತೀರ್ಥ ಶ್ರೀಗಳು ಪೂರ್ವಾಶ್ರಮದಲ್ಲಿ ಬೆಂಗಳೂರಿನಲ್ಲಿ ಆರ್ಸನ್ ಸಾಫ್ಟ್ವೇರ್ ಕಂಪನಿಯಲ್ಲಿ ಟೀಂ ಲೀಡರ್ ಆಗಿ ಕಾರ್ಯನಿರ್ವಹಿಸಿದ್ದು, 8 ತಿಂಗಳ ಹಿಂದೆ ಬೆಂಗಳೂರಿನ ಮಠದಲ್ಲಿ ಪುತ್ತಿಗೆಶ್ರೀಗಳನ್ನು ಭೇಟಿ ಮಾಡಿದ್ದ ಪ್ರಶಾಂತ್ ಆಚಾರ್ಯ, ಸನ್ಯಾಸಾಶ್ರಮ ಸ್ವೀಕರಿಸುವ ಇಚ್ಛೆ ವ್ಯಕ್ತಪಡಿಸಿದ್ದರು. ಸನ್ಯಾಸದ ಬಗ್ಗೆ ಅವರ ಒಲವು ನೋಡಿ ಎಲ್ಲ ಕಡೆಗಳಿಂದಲೂ ಮಾಹಿತಿ ಸಂಗ್ರಹಿಸಿ, ಜಾತಕ ವಿಮರ್ಶೆ ಮಾಡಿ ದೀಕ್ಷೆ ನೀಡಲು ನಿರ್ಧರಿಸಲಾಯಿತಂತೆ.
ಹುಡುಗಿಯರ ಬಗ್ಗೆ ಆಸಕ್ತಿ ಇಲ್ಲ : ಪುತ್ತಿಗೆ ಮಠದ ಶಿಷ್ಯರ ಹಿಂದೆ ನಡೆದಿತ್ತು ಬೇಹುಗಾರಿಕೆ….!
ಇನ್ನು ತಮ್ಮ ಸನ್ಯಾಸ ದೀಕ್ಷೆ ಕುರಿತಂತೆ ಮಾತನಾಡಿರುವ ಸುಶ್ರೀಂದ್ರ ತೀರ್ಥ ಶ್ರೀಗಳು,ಕಳೆದ 15 ವರ್ಷದಿಂದ ಸನ್ಯಾಸದ ಆಸಕ್ತಿ ಇತ್ತು. ಐದು ವರ್ಷದಿಂದ ಕೃಷ್ಣಪೂಜೆ ಹಂಬಲ ತೀವ್ರವಾಗಿತ್ತು. ಆದರೆ ಸನ್ಯಾಸ ದೀಕ್ಷೆ ಯಾರಲ್ಲಿ ಕೇಳುವುದು ಎಂಬುದು ತಿಳಿಯುತ್ತಿರಲಿಲ್ಲ.
ಕೃಷ್ಣ-ಮುಖ್ಯಪ್ರಾಣ ದೇವರ ಅನುಗ್ರಹದಿಂದ ಪುತ್ತಿಗೆ ಶ್ರೀಗಳು ಶಿಷ್ಯನನ್ನಾಗಿ ಸ್ವೀಕರಿಸಿ ಅನುಗ್ರಹಿಸಿದ್ದಾರೆ. ಮಠದ ಜ್ಞಾನ ಪರಂಪರೆ ವಿಶಿಷ್ಟವಾಗಿದೆ. ಇದನ್ನು ಮುಂದುವರಿಸಿಕೊಂಡು ಹೋಗುತ್ತೇನೆ. ತಾಯಿ ಕೃಷ್ಣನ ಭಕ್ತೆಯಾಗಿದ್ದು, ಕೃಷ್ಣನ ಸೇವೆಗೆ ಸನ್ಯಾಸ ಸ್ವೀಕರಿಸುವುದರಿಂದ ಒಪ್ಪಿಕೊಂಡಿದ್ದಾರೆ ಅಂದಿದ್ದಾರೆ.
ಇನ್ನು ಶಿಷ್ಯ ಸ್ವೀಕಾರ ತರಾತುರಿಯಲ್ಲಿ ನಡೆಯಿತು ಅನ್ನುವುದನ್ನು ಒಪ್ಪಿಕೊಂಡಿರುವ ಪುತ್ತಿಗೆ ಹಿರಿಯಶ್ರೀಗಳು, ಪುತ್ತಿಗೆ ಮಠ ವಿಶ್ವಮಟ್ಟದಲ್ಲಿ ಧರ್ಮ ಪ್ರಚಾರ ಕಾರ್ಯ ನಡೆಸುತ್ತಿದ್ದು, 11 ದೇಶಗಳಲ್ಲಿ ಶಾಖಾ ಮಠಗಳನ್ನು ಹೊಂದಿದೆ. ಮುಂದಿನ ದಿನಗಳಲ್ಲಿ 108 ದೇಶಗಳಲ್ಲಿ ಕೃಷ್ಣ ಮಂದಿರ ನಿರ್ಮಾಣ ಸಂಕಲ್ಪ ಕೈಗೊಳ್ಳಲಾಗಿದೆ. ಹೀಗಾಗಿ ಕಾರ್ಯ ಬಾಹುಲ್ಯ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಶಿಷ್ಯ ಸ್ವೀಕಾರಕ್ಕೆ ನಿರ್ಧರಿಸಲಾಯಿತು.
ಶುಭ ಮುಹೂರ್ತಕ್ಕೆ ಸೋಮವಾರ ಹೊರತುಪಡಿಸಿದರೆ ಬೇರೆ ದಿನಕ್ಕೆ ಒಂದೂವರೆ ವರ್ಷ ಕಾಯಬೇಕಾಗಿದ್ದರಿಂದ ಸರಳ ಸಮಾರಂಭದಲ್ಲಿ ಸನ್ಯಾಸ ದೀಕ್ಷೆ ಕಾರ್ಯಕ್ರಮ ನಿಗದಿಪಡಿಸಲಾಯಿತು ಎಂದಿದ್ದಾರೆ.
ಅಷ್ಟಮಠಗಳ ಯತಿಗಳ ಗೈರಿನ ನಡುವೆ ಪುತ್ತಿಗೆ ಮಠಕ್ಕೆ ಶಿಷ್ಯ ಸ್ವೀಕಾರ…!
ತುರ್ತಾಗಿ ಸನ್ಯಾಸ ದೀಕ್ಷೆ ಕಾರ್ಯಕ್ರಮ ಆಯೋಜಿಸಿದ ಕಾರಣ ಅನೇಕ ಮಠದ ಅಭಿಮಾನಿಗಳು, ಶಿಷ್ಯರಿಗೆ ಆಮಂತ್ರಣ ನೀಡಲು ಸಾಧ್ಯವಾಗಲಿಲ್ಲ. ಹೀಗಾಗಿ ಮೇ 16ರಂದು ನರಸಿಂಹ ಜಯಂತಿಯಂದು ಪುತ್ತಿಗೆ ಮೂಲ ಮಠದಲ್ಲಿ ಸಾರ್ವಜನಿಕ ಅಭಿನಂದನಾ ಹಾಗೂ ಗುರುವಂದನಾ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ಪುತ್ತಿಗೆ ಶ್ರೀಗಳು ಸ್ಪಷ್ಟಪಡಿಸಿದ್ದಾರೆ.
Discussion about this post