ಭಾರತಕ್ಕೆ ಕಾಲಿಟ್ಟ ರಷ್ಯಾ ಮದ್ದು – ಚೀನಾ ವೈರಸ್ ಅನ್ನು ಸೋಲಿಸಲು ಬಂತು ಮೂರನೇ ಲಸಿಕೆ

ಬೆಂಗಳೂರು : ಕೊರೋನಾ ವಿರುದ್ಧದ ಹೋರಾಟದಲ್ಲಿ ನಿರತವಾಗಿರುವ ಭಾರತಕ್ಕೆ ಬಲ ತುಂಬುವ ಸಲುವಾಗಿ ಮತ್ತೊಂದು ಲಸಿಕೆ ಭಾರತಕ್ಕೆ ಬರಲಿದೆ. ಈಗಾಗಲೇ ಭಾರತದಲ್ಲಿ ಮೂರನೇ ಹಂತದ ಟ್ರಯಲ್ ಮುಗಿಸಿರುವ ಈ ಲಸಿಕೆ ಇನ್ನು ಕೆಲವೇ ದಿನಗಳಲ್ಲಿ ಜನರಿಗೆ ವಿತರಣೆಯಾಗಲಿದೆ.

ರಷ್ಯಾದ ಸ್ಪುಟ್ನಿಕ್ 5 ಲಸಿಕೆಯನ್ನು ತುರ್ತು ಬಳಕೆಗೆ ಬಳಸಬಹುದು ಎಂದು ಸೋಮವಾರ ಭಾರತ ಜೌಷಧ ಪ್ರಾಧಿಕಾರದ ತಜ್ಞರ ಸಮಿತಿ ಶಿಫಾರಸು ಮಾಡಿತ್ತು. ಇದರ ಬೆನ್ನಲ್ಲೇ ಇದೀಗ ಭಾರತೀಯ ಜೌಷಧ ನಿಯಂತ್ರಣ ಪ್ರಾಧಿಕಾರ ಅಂತಿಮ ಒಪ್ಪಿಗೆ ನೀಡಿದೆ.

ಅಂತಿಮ ಅನುಮತಿ ಸಿಕ್ಕ ಬೆನ್ನಲ್ಲೇ ಭಾರತದಲ್ಲಿ ಸ್ಪುಟ್ನಿಕ್ 5 ಲಸಿಕೆ ಉತ್ಪಾದನೆ ಮತ್ತು ಪೂರೈಕೆಯ ಹೊಣೆ ಹೊತ್ತಿರುವ ಡಾ. ರೆಡ್ಡೀಸ್ ಲ್ಯಾಬ್ ರಷ್ಯಾದಿಂದ ಲಸಿಕೆ ಆಮದು ಮಾಡಿಕೊಳ್ಳುವುದಾಗಿ ತಿಳಿಸಿದೆ. 25 ಕೋಟಿ ಡೋಸ್ ಲಸಿಕೆಗಳು ಇನ್ನು ಕೆಲವೇ ವಾರಗಳಲ್ಲಿ ಭಾರತಕ್ಕೆ ಬರಲಿದೆ.  ಜೂನ್ ಜುಲೈ ಬಳಿಕ ಭಾರತದಲ್ಲೇ ಸ್ಪುಟ್ನಿಕ್ 5 ಉತ್ಪಾದನೆ ಪ್ರಾರಂಭವಾಗಲಿದೆ. ವರ್ಷಕ್ಕೆ 85 ಕೋಟಿ ಡೋಸ್ ಲಸಿಕೆ ಉತ್ಪಾದಿಸುವ ಗುರಿಯನ್ನು ಡಾ. ರೆಡ್ಡೀಸ್ ಲ್ಯಾಬ್ ಹೊಂದಿದೆ.

ಸ್ಪುಟ್ನಿಕ್ 5 ಈ ಹಿಂದಿನ ಲಸಿಕೆಗಳಂತೆ ಎರಡು ಡೋಸ್ ಗಳ ಲಸಿಕೆಯಾಗಿದ್ದು, ಮೊದಲ ಡೋಸ್ ಪಡೆದ 21 ದಿನಗಳ ಬಳಿಕ ಎರಡನೇ ಡೋಸ್ ಪಡೆಯಬೇಕಾಗುತ್ತದೆ.

ಮೈನಸ್ 18 -20 degree Celsius ಕೋಲ್ಡ್ ಚೈನ್ ನಲ್ಲಿ ಇದನ್ನು ಸಾಗಿಸಬೇಕಾಗುತ್ತದೆ. ಹೀಗಾಗಿ ಈ ಲಸಿಕೆಯನ್ನು ಸರ್ಕಾರ ಉಚಿತವಾಗಿ ವಿತರಿಸುತ್ತದೆಯೇ ಅನ್ನುವ ಬಗ್ಗೆ ಸ್ಪಷ್ಟತೆ ದೊರೆತಿಲ್ಲ.

ಜನವರಿಯಲ್ಲಿ ಮೂರನೇ ಹಂತದ ಕ್ಲಿನಿಕಲ್ ಟ್ರಯಲ್ ಎದುರಿಸಿದ್ದ ಸ್ಪುಟ್ನಿಕ್ 5 ಲಸಿಕೆಯ ದಾಖಲೆಗಳು ಇತ್ತೀಚಿಗೆ ಸಂಬಂಧಪಟ್ಟ ಇಲಾಖೆಗೆ ಸಲ್ಲಿಕೆಯಾಗಿತ್ತು.

ಈಗಾಗಲೇ ದೇಶದಲ್ಲಿ ಎರಡು ಲಸಿಕೆಗಳ ವಿತರಣೆ ಕಾರ್ಯ ನಡೆಯುತ್ತಿದೆ. ಹಲವು ರಾಜ್ಯಗಳು ಕೊರೋನಾ ಲಸಿಕೆಯ ಕೊರತೆ ಎದುರಿಸುತ್ತಿದೆ. ಹೀಗಾಗಿ ಮೂರನೇ ಲಸಿಕೆ ಕೊರೋನಾ ವಿರುದ್ಧದ ಭಾರತದ ಹೋರಾಟಕ್ಕೆ ಬಲ ತುಂಬಲಿದೆ.