ನವದೆಹಲಿ : ಶ್ರೀಲಂಕಾದ ರತ್ನಪುರ ನಿವಾಸಿ ಗಾಮಗೆ ಅನ್ನುವವರು ಕುಡಿಯುವ ನೀರಿನ ಸಲುವಾಗಿ ಮನೆ ಸಮೀಪ ಬಾವಿ ತೋಡುತ್ತಿದ್ದರು. ಒಂದ್ಸಲ ಗಂಗೆ ಸಿಕ್ರೆ ಸಾಕು ಮನೆ ಮಂದಿಯ ಬಾಯಾರಿಕೆ ಇಂಗುತ್ತದೆ ಅನ್ನುವುದು ಅನರ ನಿರೀಕ್ಷೆಯಾಗಿತ್ತು. ಈ ವೇಳೆ ಅವರಿಗೆ ಸಿಕ್ಕಿದ್ದು ಬೃಹತ್ ಗಾತ್ರದ ಶಿಲೆ.
ಬಾವಿ ತೋಡುವಾಗ ಸಿಕ್ಕ ಕಲ್ಲು ಸಾಮಾನ್ಯವಲ್ಲ ಎನೋ ವಿಶೇಷವಿದೆ ಅನ್ನುವುದು ಮನೆ ಮಾಲೀಕರಿಗೆ ಗೊತ್ತಾಗಿತ್ತು. ಹೀಗಾಗಿ ಅಧಿಕಾರಿಗಳ ಗಮನಕ್ಕೆ ತಂದಿದ್ದರು. ಕಳೆದ ವರ್ಷ ಈ ಘಟನೆ ನಡೆದಿದ್ದು, ಸ್ಥಳಕ್ಕೆ ಬಂದ ಅಧಿಕಾರಿಗಳು ಪರಿಶೀಲನೆ ನಡೆಸಿ 510 ಕೆಜಿ ತೂಕದ ಕಲ್ಲನ್ನು ತೆಗೆದುಕೊಂಡು ಹೋಗಿದ್ದಾರೆ. ಇದಾದ ಬಳಿಕ ಎಲ್ಲರೂ ಈ ವಿಷಯವನ್ನು ಮರೆತಿದ್ದರು.
ಆದರೆ ಇದೀಗ ಗೊತ್ತಾಗಿದೆ. ಗಾಮಗೆ ಮನೆಯಲ್ಲಿ ಸಿಕ್ಕಿರುವುದು ಸಾಮಾನ್ಯ ಶಿಲೆಯಲ್ಲ ಅದೊಂದು ನೀಲಮಣಿ ಎಂದು. ಕೇವಲ ನೀಲಮಣಿ ಮಾತ್ರವಲ್ಲ ಜಗತ್ತಿನ ಅತೀ ದೊಡ್ಡ ನೀಲಮಣಿಗೂ ಅದು ಪಾತ್ರವಾಗಿದೆ. ಅಂದ ಹಾಗೇ ಇದರ ಮೊತ್ತ 744 ಕೋಟಿ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.
ಕಲ್ಲನ್ನು ಸಂಪೂರ್ಣವಾಗಿ ಶುಚಿಗೊಳಿಸಲು ಸುಮಾರು ಒಂದು ವರ್ಷಗಳ ಕಾಲಾವಕಾಶವನ್ನು ತೆಗೆದುಕೊಳ್ಳಲಾಗಿದೆ. ನಂತರದ ಕಲ್ಲಿನ ಕುರಿತು ಸಂಶೋಧನೆಯನ್ನು ನಡೆಸಲಾಗಿದ್ದು, ಅದು ವಿಶ್ವದ ಅತೀ ದೊಡ್ಡ ನೀಲಮಣಿ ಅನ್ನೋದು ಬಹಿರಂಗವಾಗಿದೆ. ಖಾಸಗಿ ಸಂಗ್ರಾಹಕರು ಅಥವಾ ವಸ್ತುಸಂಗ್ರಹಾಲಯಗಳು ಹೆಚ್ಚು ಆಸಕ್ತಿಯನ್ನು ತೋರಿಸಿದರೆ ದೊಡ್ಡ ಮೊತ್ತಕ್ಕೆ ಈ ನೀಲಮಣಿ ಮಾರಾಟವಾಗಬಹುದು ಎಂದು ಶ್ರೀಲಂಕಾದ ರಾಷ್ಟ್ರೀಯ ರತ್ನ ಮತ್ತು ಆಭರಣ ಪ್ರಾಧಿಕಾರದ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
Discussion about this post