ಕಿಚ್ಚ ಇದ್ದರೇನಂತೆ…. ಬಿಗ್ ಬಾಸ್ ಆಫರ್ ತಿರಸ್ಕರಿಸಿದ ಸೆಲೆಬ್ರೆಟಿಗಳು ಯಾರೆಲ್ಲಾ ಗೊತ್ತಾ…?

ಬಿಗ್ ಬಾಸ್ ಕಾರ್ಯಕ್ರಮ ಪ್ರಾರಂಭಕ್ಕೆ ಇನ್ನು ಮೂರೇ ದಿನಗಳು ಬಾಕಿ. ಈಗಾಗಲೇ ಸ್ಪರ್ಧಿಗಳು ತಮ್ಮ ಕ್ವಾರಂಟೈನ್ ನ ಕೊನೆಯ ದಿನಗಳನ್ನು ಎಣಿಸುತ್ತಿದ್ದಾರೆ.

ಒಂದೆರಡು ಸ್ಪರ್ಧಿಗಳು ಹೊಟೇಲ್ ಕ್ವಾರಂಟೈನ್ ಗೆ ಒಪ್ಪದ ಹಿನ್ನಲೆಯಲ್ಲಿ ಮನೆಯಲ್ಲೇ ಕ್ವಾರಂಟೈನ್ ನಲ್ಲಿದ್ದಾರೆ. ಕಾರ್ಯಕ್ರಮ ಪ್ರಾರಂಭದ 72 ಗಂಟೆ ಮುಂಚೆ ಇವರಿಗೆ ಕೊರೋನಾ ಪರೀಕ್ಷೆ ನಡೆಯಲಿದ್ದು ಬಳಿಕ ಬಿಗ್ ಬಾಸ್ ಮನೆ ಪ್ರವೇಶಿಸಲಿದ್ದಾರೆ. ಒಂದು ವೇಳೆ ಪಾಸಿಟಿವ್ ಬಂದ್ರೆ ನೇರವಾಗಿ ಮನೆ ಅಥವಾ ಆಸ್ಪತ್ರೆಗೆ ಕಳುಹಿಸುವ ಬಗ್ಗೆಯೂ ತೀರ್ಮಾನಿಸಲಾಗಿದೆ.

ಈ ನಡುವೆ ಬಿಗ್ ಬಾಸ್ ಮನೆ ಅವರು ಹೋಗ್ತಾರಂತೆ, ಇವರು ಹೋಗ್ತಾರಂತೆ ಅನ್ನುವ ಸುದ್ದಿಗಳು ಹರಿದಾಡುತ್ತಿದೆ.

ಆದರೆ ಹೋಗುವವರು ಯಾರು ಅನ್ನೋದು ಇನ್ನೂ ಪಕ್ಕಾ ಆಗಿಲ್ಲ. ಆದರೆ ಹರಿದಾಡುತ್ತಿರುವ ಹೆಸರುಗಳ ಪೈಕಿ 5 ರಿಂದ 6 ಮಂದಿ ಮನೆ ಪ್ರವೇಶಿಸುವುದು ಗ್ಯಾರಂಟಿ. ಯಾಕಂದ್ರೆ ಕರೆ ಮಾಡಿದ್ರೆ ಅವರೆಲ್ಲಾರ ನಂಬರ್ ಗಳು ನಾಟ್ ರಿಚೇಬಲ್ ನಲ್ಲಿದೆ.

ಮತ್ತೆ ಕೆಲವರ ಫೋನ್ ಗಳು ಅವರ ಸ್ನೇಹಿತರು, ಸಂಬಂಧಿಗಳ ಬಳಿ ಇದೆ.

ಇದು ಬಿಗ್ ಬಾಸ್ ಮನೆಗೆ ಹೋಗುವವರ ಕಥೆಯಾಯ್ತು. ಆದರೆ ನಾವು ಹೇಳ್ತಾ ಇರೋದು ಬಿಗ್ ಬಾಸ್ ಆಫರ್ ಅನ್ನು ನಯವಾಗಿ ತಿರಸ್ಕರಿಸಿದವರ ಬಗ್ಗೆ.

ಅನಿರುದ್ಧ್

ಜೊತೆ ಜೊತೆಯಲ್ಲಿ ಧಾರಾವಾಹಿಯಲ್ಲಿ ಸಿಕ್ಕಾಪಟ್ಟೆ ಬ್ಯುಸಿಯಾಗಿರುವ ಅನಿರುದ್ಧ್ ಮಹಾಮನೆ ಪ್ರವೇಶಿಸುತ್ತಾರೆ ಅನ್ನುವ ಸುದ್ದಿಗಳು ಹರಿದಾಡಿತ್ತು.

ಆದರೆ ಇದೀಗ ಅವರೇ ನಾನು ಬಿಗ್ ಬಾಸ್ ಮನೆಗೆ ಹೋಗೋದಿಲ್ಲ ಎಂದು ದೃಢಪಡಿಸಿದ್ದಾರೆ. ಮೂಲಗಳ ಪ್ರಕಾರ ಅನಿರುದ್ಧ್ ಅವರಿಗೆ ಬಿಗ್ ಬಾಸ್ ಆಫರ್ ಬಂದಿರೋದು ಸತ್ಯ. ಆದರೆ ಜೊತೆ ಜೊತೆಯಲ್ಲಿ ಧಾರಾವಾಹಿಗೆ ಅನಿರುದ್ಧ್ ಅವರೇ ಜೀವಾಳ. ಹೀಗಾಗಿ ನಾನು ಅರ್ಧದಲ್ಲೇ ಟೀಂ ತೊರೆದ್ರೆ ಸರಿಯಲ್ಲ ಎಂದು ಬಿಗ್ ಬಾಸ್ ಮನೆಗೆ ಹೋಗದಿರಲು ಅನಿರುದ್ಧ್ ನಿರ್ಧರಿಸಿದ್ದಾರೆ.

ವಿನಯ ಪ್ರಸಾದ್

ನಟಿ, ನಿರೂಪಕಿ ವಿನಯಪ್ರಸಾದ್ ಬಿಗ್ ಬಾಸ್ ಮನೆಗೆ ಹೋಗ್ತಾರೆ ಅನ್ನುವ ಸುದ್ದಿಗಳು ಹರಿದಾಡಿತ್ತು.

ಆದರೆ ಇದೀಗ ವಿನಯ ಪ್ರಸಾದ್ ಬಿಗ್ ಮನೆಗೆ ಹೋಗೋದಿಲ್ಲ ಎಂದು ಅವರ ಪುತ್ರಿ ಪ್ರಥಮಾ ಪ್ರಸಾದ್ ಸ್ಪಷ್ಟ ಪಡಿಸಿದ್ದಾರೆ.

ಅದೊಂದು controversial show ಆಗಿರೋ ಕಾರಣ ಅಮ್ಮಾ ಅದರಲ್ಲಿ ಪಾಲ್ಗೊಳ್ಳುತ್ತಿಲ್ಲ ಅಂದಿದ್ದಾರೆ.

ವಿನಯಪ್ರಸಾದ್ ಅವರಿಗೂ ಕಲರ್ಸ್ ಟೀಂ ಗಾಳ ಹಾಕಿತ್ತು. ಆದರೆ ತಮ್ಮ ಬಣ್ಣದ ಬದುಕಿನಲ್ಲಿ ಎಂದಿಗೂ ವಿವಾದಗಳನ್ನು ಸೃಷ್ಟಿಸಿಕೊಂಡವರಲ್ಲ ವಿನಯಪ್ರಸಾದ್. ಜೊತೆಗೆ ಗಾಸಿಪ್ ಜಗತ್ತಿನಿಂದ ಸಾಕಷ್ಟು ದೂರವಿರುವ ಅವರು ತಾವಾಯ್ತು ತಮ್ಮ ಕೆಲಸವಾಯ್ತು ಅಂದಿರುವವರು.

ಹೀಗಾಗಿ ಮಹಾಮನೆಗೆ ಹೋಗಿ ಅದ್ಯಾವುದೋ ಕಾರಣಕ್ಕೆ ರಾಡಿ ರಂಪಾಟವಾಗಿ ಹೆಸರು ಕೆಡಿಸಿಕೊಳ್ಳುವುದ್ಯಾಕೆ ಎಂದು ನಿರ್ಧರಿಸಿದಂತಿದೆ.

ಕಾವ್ಯ ಗೌಡ

ಕಿರುತೆರೆ ನಟಿ ಕಾವ್ಯಾ ಗೌಡ ಈ ಬಾರಿ ಬಿಗ್ ಬಾಸ್ ಕಾರ್ಯಕ್ರಮಕ್ಕೆ ಹೋಗ್ತಾರೆ ಅನ್ನುವ ಸುದ್ದಿಗಳು ಹರಿದಾಡಿದ್ದು. ಆದರೆ ಇದೀಗ ಅವರು ಕೂಡಾ ಬಿಗ್ ಬಾಸ್ ಮನೆಗೆ ಹೋಗೋದಿಲ್ಲ ಎಂದು ಪಕ್ಕಾ ಆಗಿದೆ. ಈಗಾಗಲೇ ಒಪ್ಪಿಕೊಂಡಿರುವ ಕೆಲಸಗಳನ್ನು ಮುಗಿಸುವ ಕಮಿಟ್ಮೆಂಟ್ ಅವರದ್ದು ಹೀಗಾಗಿ ಅವರು ಬಿಗ್ ಬಾಸ್ ಮನೆಗೆ ಹೋಗದಿರಲು ನಿರ್ಧರಿಸಿದ್ದಾರೆ.

ಹಾಗಂತ ಅದನ್ನು ಅವರು ಹೇಳಿಲ್ಲ. ಅವರ ಸಹೋದರಿ ಭವ್ಯಾ ಗೌಡ ಈ ಬಗ್ಗೆ ಸುಳಿವು ಬಿಟ್ಟುಕೊಟ್ಟಿದ್ದಾರೆ.

ಹಿತಾ ಚಂದ್ರಶೇಖರ್

ಸ್ಟಾರ್ ದಂಪತಿಯ ಪುತ್ರಿ ಹಿತಾ ಚಂದ್ರಶೇಖರ್ ಬಿಗ್ ಬಾಸ್ ಮನೆಗೆ ಹೋಗ್ತಾರೆ ಅನ್ನಲಾಗಿತ್ತು. ಈ ಹಿಂದೆ ಅವರ ಕುಟುಂಬ ಸದಸ್ಯರು ಬಿಗ್ ಬಾಸ್ ಮನೆಗೆ ಬೇರೆ ಹೋಗಿ ಬಂದಿದ್ದಾರೆ.

ಆದರೆ ಬಿಗ್ ಬಾಸ್ ಆಫರ್ ಅನ್ನು ತಿರಸ್ಕರಿಸಿರುವ ಹಿತಾ ಚಂದ್ರಶೇಖರ್, ನನ್ನ ಕುಟುಂಬವನ್ನು ಅಷ್ಟೊಂದು ದಿನ ಬಿಟ್ಟಿರುವುದು ಸಾಧ್ಯವಿಲ್ಲ. ಹೀಗಾಗಿ ನಾನು ಹೋಗೋದಿಲ್ಲ ಅಂದಿದ್ದಾರೆ.

ಆದರೆ ಹಿತಾ ಬದಲಾಗಿ ಅವರ ಪತಿ ಕಿರಣ್ ಬಿಗ್ ಬಾಸ್ ಮನೆಗೆ ಹೋಗೋದು ಪಕ್ಕಾ ಆಗಿದೆ.

ವೈಷ್ಣವಿ

ಅಗ್ನಿ ಸಾಕ್ಷಿ ಧಾರಾವಾಹಿ ಖ್ಯಾತಿಯ ವೈಷ್ಣವಿ ಹೆಸರು ಕೂಡಾ ಸೀಸನ್ 8 ರಲ್ಲಿ ಪ್ರಬಲವಾಗಿ ಕೇಳಿ ಬಂದಿತ್ತು. ಆದರೆ ಅವರು ಬಿಗ್ ಬಾಸ್ ಮನೆಗೆ ಹೋಗೋದಿಲ್ಲ ಅಂದಿದ್ದಾರೆ.

ಚಿತ್ರವೊಂದರ ಕೆಲಸದಲ್ಲಿ ತೊಡಿಗಿಸಿಕೊಂಡಿರುವುದರಿಂದ ಬಿಗ್ ಬಾಸ್ ಆಫರ್ ಸ್ವೀಕರಿಸಲಾಗದು ಅಂದಿದ್ದಾರೆ.