ಬಿಗ್ ಬಾಸ್ ಮನೆಯ ಆಟ ಮುಗಿಯಲು ಇನ್ನು ಕೆಲವೇ ದಿನಗಳು ಬಾಕಿ. ಹೀಗಾಗಿ ಗೆಲುವಿನ ವೇದಿಕೆಯಲ್ಲದಿದ್ದರೂ, ಟಾಪ್ 5ನಲ್ಲಾದರೂ ಕಾಣಿಸಿಕೊಳ್ಳಬೇಕು ಎಂದು ಸ್ಪರ್ಧಿಗಳು ಗುದ್ದಾಟ ಪ್ರಾರಂಭಿಸಿದ್ದಾರೆ. ವೀಕ್ಷಕರ ಲೆಕ್ಕಚಾರದ ಪ್ರಕಾರ ಅರವಿಂದ್, ಮಂಜು, ವೈಷ್ಣವಿ, ದಿವ್ಯಾ ಉರುಡುಗ ಹಾಗೂ ಶಮಂತ್ ಟಾಪ್ 5 ನಲ್ಲಿರುತ್ತಾರೆ ಎನ್ನಲಾಗಿದೆ. ಆದರೆ ಇದೀಗ ಪ್ರಶಾಂತ್ ಸಂಬರಗಿ ಈ ಪೈಕಿ ಒಬ್ಬರನ್ನು ರಿಪ್ಲೇಸ್ ಮಾಡುವ ಸಾಧ್ಯತೆಗಳಿದೆಯಂತೆ.
ಅದಕ್ಕೆ ಕಾರಣ ಈ ವಾರ ಸಿಕ್ಕ ಕಿಚ್ಚನ ಚಪ್ಪಾಳೆ. ಪ್ರತೀ ವಾರದಂತೆ ವಾರದ ಸಾಧಕನಿಗೆ ನೀಡುವ ಕಿಚ್ಚನ ಚಪ್ಪಾಳೆಯ ಗೌರವ ಪ್ರಶಾಂತ್ ಸಂಬರಗಿಗೆ ಸಂದಿದೆ. ವಿಶೇಷ ಅಂದ್ರೆ ಮನೆಯವರು ಸೇರಿ ಕಳಪೆ ಎಂದು ನಿರ್ಧರಿಸಿದ ಸ್ಪರ್ಧಿಗೆ ಕಿಚ್ಚನ ಚಪ್ಪಾಳೆಯ ಗೌರವ ಸಂದಿದೆ. ಅಲ್ಲಿಗೆ ಮನೆಯವರು ಕಳಪೆ ನೀಡುವ ವೇಳೆ ತಪ್ಪು ಹೆಜ್ಜೆ ಇಟ್ಟಿದ್ದಾರೆ ಅನ್ನುವುದು ಸ್ಪಷ್ಟ. ಅದರಲ್ಲೂ ಕೂಡಾ ಶುಭಾಳಿಗೆ ಕಳಪೆ ಪಟ್ಟ ಸಿಗಬಾರದು ಎಂದು ದಿವ್ಯಾ ಉರುಡುಗ ಪ್ರಶಾಂತ್ ಗೆ ಕಳಪೆ ಪಟ್ಟ ಕಟ್ಟಿದ್ದರು.
ಹಾಗೇ ನೋಡಿದರೆ ಪ್ರಶಾಂತ್ ಸಂಬರಗಿ ಈ ವಾರ ಅದ್ಭುತವಾಗಿ ಆಡಿದ್ದಾರೆ. ಮಾತ್ರವಲ್ಲದೆ ತಮ್ಮ ಹಳೆಯ ಕೋಪ ತಾಪಗಳನ್ನು ಸೈಡಿಗಿಟ್ಟು ಹೆಸರಿಗೆ ತಕ್ಕಂತೆ ಪ್ರಶಾಂತವಾಗಿದ್ದರು. ತಮ್ಮ ಸಿಕ್ಕ ಅವಕಾಶವನ್ನು ಬಳಸಿಕೊಂಡಿದ್ದ ಅವರು ಮನೋರಂಜನೆಗೂ ಕೊರತೆ ಮಾಡಿರಲಿಲ್ಲ. ಆದರೆ ಇತರ ಸ್ಪರ್ಧಿಗಳ ಕಣ್ಣಿಗೆ ಅವರ ಸಾಧನೆ ಕಾಣಿಸಿಯೇ ಇರಲಿಲ್ಲ. ಸಂಬರಗಿ ಮೇಲೆ ಪೂರ್ವಾಗ್ರಹ ಪೀಡಿತರಾಗಿರುವ ಬಹುತೇಕ ಸ್ಪರ್ಧಿಗಳು ಕಳಪೆ ಪಟ್ಟ ಕಟ್ಟಿದ್ದಾರೆ.
ಇನ್ನು ಈ ಬೆಳವಣಿಗೆ ನೋಡಿದರೆ ಪ್ರಶಾಂತ್ ಸಂಬರಗಿ ವಿರುದ್ಧ ಗುಂಪುಗಾರಿಕೆ ಅನ್ನುವುದು ಸ್ಪಷ್ಟ. ಇದೇ ಗುಂಪುಗಾರಿಕೆ ಪ್ರಶಾಂತ್ ರನ್ನ ಫೈನಲ್ ವೇದಿಕೆ ತನಕ ಕರೆದುಕೊಂಡು ಹೋದರೂ ಅಚ್ಚರಿ ಇಲ್ಲ.
Discussion about this post