ಪ್ರಶಾಂತ್ ಸಂಬರಗಿ ಗೆಲುವಿಗಾಗಿ ಸಾಮಾಜಿಕ ಜಾಲತಾಣದಲ್ಲಿ ಹರಿಯುತ್ತಿದೆ ಬೆವರು..!

ಬಿಗ್ ಬಾಸ್ ಸೀಸನ್ 8ರಲ್ಲಿ ಟಾಪ್ 5ಕ್ಕೆ ತಲುಪಿರುವ ಅಚ್ಚರಿಯ ಸ್ಪರ್ಧಿ ಅಂದ್ರೆ ಅದು ಪ್ರಶಾಂತ್ ಸಂಬರಗಿ. ಆದರೆ ಬಿಗ್ ಬಾಸ್ ಮನೆ ಪ್ರವೇಶಿಸುವ ಮುನ್ನ ಅವರು ಮಾಧ್ಯಮಗಳಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡಿದ್ದರು. ಅದರಲ್ಲೂ ಸಂಜನಾ ಗಲ್ರಾನಿ ಮತ್ತು ಸಂಬರಗಿಯವರ ಜಗಳವನ್ನು ಜನ ಮರೆತಿಲ್ಲ. ಸಾರಾ ಗೋವಿಂದು, ನಿರ್ಮಾಪಕ ಮಂಜು ಮತ್ತು ಸಂಬರಗಿ ವಿವಾದ ಬಿಗ್ ಬಾಸ್ ಕಾರ್ಯಕ್ರಮಕ್ಕೂ ಮುನ್ನ ಮನೋರಂಜನೆ ಕೊಟ್ಟಿತ್ತು.

ಇನ್ನು ಇನ್ನಿಂಗ್ಸ್ 1 ರಲ್ಲಿ ಕಿರಿ ಕಿರಿ ಉಂಟು ಮಾಡಿದ್ದ ಸಂಬರಗಿ ಮನೆಯಿಂದ ಹೊರಗೆ ಹೋದ್ರೆ ಸಾಕು ಎಂದು ವೀಕ್ಷಕರು ಬಯಸಿದ್ದರು. ಅದರಲ್ಲೂ ಚಂದ್ರಚೂಡ್ ಬಿಗ್ ಬಾಸ್ ಮನೆಗೆ ಬಂದ ಬಳಿಕ ಸಂಬರಗಿ ಸಂಪೂರ್ಣ ಹಾದಿ ತಪ್ಪಿದ್ದರು. ಹೀಗಾಗಿ ವೀಕ್ಷಕರಿಗೆ ಸಂಬರಗಿ ಮೇಲಿದ್ದ ಗೌರವ ಕಡಿಮೆಯಾಗಿತ್ತು.

ಯಾವಾಗ ಎರಡನೇ ಇನ್ನಿಂಗ್ಸ್ ಪ್ರಾರಂಭವಾಯ್ತೋ, ಪ್ರಶಾಂತ್ ಸಂಬರಗಿ ಆಟದ ವೈಖರಿಯೇ ಬದಲಾಗಿತ್ತು. ಮೊದಲ ಇನ್ನಿಂಗ್ಸ್ ತಪ್ಪುಗಳನ್ನು ಅವರು ತಿದ್ದಿಕೊಂಡಿದ್ದರು. ಮಾತು ಎತ್ತಿದ್ರೆ ಗುಂಪುಗಾರಿಕೆ ಅನ್ನುತ್ತಿದ್ದ ಪ್ರಶಾಂತ್ ಸ್ಟ್ರಾಟರ್ಜಿ ಆಟ ಪ್ರಯೋಗಿಸಿದರು. ಎಲ್ಲರ ಜೊತೆ ಬೆರೆಯಲಾರಂಭಿಸಿದರು.

ಅದರಲ್ಲೂ ಕಿಚ್ಚ ಸುದೀಪ್ ವಾರಾಂತ್ಯದಲ್ಲಿ ನೀಡಿದ ಸಲಹೆಗಳನ್ನು ಸ್ವೀಕರಿಸಿದರು, ತಲೆ ಹರಟೆಯನ್ನು ಸೈಡಿಗಿಟ್ಟು ತಾನು ಕೂಡಾ ಭಾವನಾತ್ಮಕ ಜೀವಿ ಅನ್ನುವುದನ್ನು ಹೊರ ಜಗತ್ತಿಗೆ ತೋರಿಸಿದರು. ಜೊತೆಗೆ ಉಳಿದ ಸ್ಪರ್ಧಿಗಳ ತಪ್ಪುಗಳನ್ನು ಎತ್ತಿ ತೋರಿಸುವ ಮೂಲಕ ವೀಕ್ಷಕರ ಮನ ಗೆದ್ದರು. ದನಿ ಏರಿಸಿ ಮಾತನಾಡಿದ್ರೆ ನಾನು ಕಳೆದು ಹೋಗುತ್ತೇನೆ ಎಂದು ಗೊತ್ತಾಗುತ್ತಿದ್ದಂತೆ ದನಿ ತಗ್ಗಿಸಿದರು.

ಅಷ್ಟೇ ಅಲ್ಲದೆ ಸಾಮಾಜಿಕ ಜಾಲತಾಣಗಳಲ್ಲಿ ಸಂಬರಗಿ ತಂಡ ಸಿಕ್ಕಾಪಟ್ಟೆ ದುಡಿಯುತ್ತಿದೆ. ಸೋಷಿಯಲ್ ಮೀಡಿಯಾದ ಪಂಟರ್ ಗಳು ಸಂಬರಗಿ ಪರ ಬೆವರು ಹರಿಸುತ್ತಿದ್ದಾರೆ ಹೀಗಾಗಿ ಸಂಬರಗಿ ಅಭಿಮಾನಿಗಳ ಬಳಗ ಬೆಳೆಯುತ್ತಿತ್ತು. ಇನ್ನು ಫೈನಲ್ ದಿನ ಹತ್ತಿರ ಬರುತ್ತಿದ್ದಂತೆ ಸಂಬರಗಿ ಪರ ಅದ್ಯಾವ ಚುನಾವಣೆಗೂ ಕಡಿಮೆ ಇಲ್ಲದಂತೆ ಪ್ರಚಾರ ನಡೆಯುತ್ತಿದೆ. ಹೇಳಿ ಹೇಳಿ ಪ್ರಶಾಂತ್ ಸಂಬರಗಿ ಪಿಆರ್ ಕಲೆಯನ್ನು ಅರೆದು ಕುಡಿದಿದ್ದಾರೆ, ಅಂದ ಮೇಲೆ ಪ್ರಚಾರ ಗಿಟ್ಟಿಸಿಕೊಳ್ಳುವುದನ್ನು ಹೇಳಿಕೊಡಬೇಕಾ.

ರಿಲಾಯನ್ಸ್ ಸಿಮ್ ಲಾಂಚ್ ಸಂದರ್ಭದಲ್ಲಿ ಸುದೀಪ್ ಅವರನ್ನು ಆಕಾಶದಿಂದ ಇಳಿಸಿ, ಬೆಂಗಳೂರಿನಲ್ಲಿ ಲಕ್ಷಾಂತರ ಸಿಮ್ ಚೆಲ್ಲುವ ಐಡಿಯಾ ಕೊಟ್ಟವರೇ ಸಂಬರಗಿ, ಹಾಗಿದ್ದ ಮೇಲೆ ತನಗೆ ಹೇಗೆ ಪ್ರಚಾರ ಗಿಟ್ಟಿಸಿಕೊಳ್ಳಬೇಕು ಅನ್ನುವುದು ಗೊತ್ತಿರಲ್ವ.