ಪೇಶಾವರ : ಅಫ್ಘಾನಿಸ್ತಾನದ ನೂತನ ತಾಲಿಬಾನ್ ಸರ್ಕಾರದ ಮುಖ್ಯಸ್ಥನನ್ನಾಗಿ ಮುಲ್ಲಾ ಮೊಹಮ್ಮದ್ ಹಸನ್ ಅಖುಂದ್‌ ಹೆಸರು ಅಂತಿಮವಾಗಿದೆ. ಈ ಬಗ್ಗೆ ಪಾಕ್ ಮಾಧ್ಯಮಗಳಲ್ಲಿ ಸುದ್ದಿ ಪ್ರಕಟವಾಗಿದ್ದು, ಉಪ ಮುಖ್ಯಸ್ಥರಾಗಿ ಮುಲ್ಲಾ ಅಬ್ದುಲ್ ಘನಿ ಬರದಾರ್, ಮುಲ್ಲಾ ಅಬ್ದುಲ್ ಸಲಾಂ ಅವರ ಹೆಸರು ಅಂತಿಮಗೊಂಡಿವೆ.
ಇನ್ನುಳಿದಂತೆ ತಾಲಿಬಾನ್ ಸಂಸ್ಥಾಪಕ ಮುಲ್ಲಾ ಒಮರ್ ಮಗ ಮುಲ್ಲಾ ಯಾಕೂಬ್ ಗೆ ರಕ್ಷಣಾ ಖಾತೆ, ಸಿರಾಜುದ್ದೀನ್ ಹಕ್ಕಾನಿ ಗೃಹ ಖಾತೆ, ಅಮೀರ್ ಖಾನ್ ಮುತ್ತಕಿನಿ ವಿದೇಶಾಂಗ ಸಚಿವರಾಗುವ ಸಾಧ್ಯತೆಗಳಿವೆ ಎಂದು ವರದಿಗಳು ಹೇಳಿವೆ.
ಈ ಮುಲ್ಲಾ ಮೊಹಮ್ಮದ್ ಹಸನ್ ಅಖುಂದ್‌ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಹೆಚ್ಚು ಜನರಿಗೆ ಪರಿಚಿತನೇ ಅಲ್ಲ. 1994ರಲ್ಲಿ ತಾಲಿಬಾನ್ ಸಂಘಟನೆ ಹುಟ್ಟುಹಾಕಿದ 30 ಸದಸ್ಯರ ಪೈಕಿ ಒಬ್ಬ. ಹಾಗೇ ನೋಡಿದರೆ ತಾಲಿಬಾನಿ ಗ್ಯಾಂಗ್ ನಲ್ಲಿ ಮುಲ್ಲಾ ಒಮರ್ ಹಾಗೂ ಮುಲ್ಲಾ ಅಬ್ದುಲ್ ಘನಿ ಬರದಾರ್ ಸಾಕಷ್ಟು ಸುದ್ದಿಯಲ್ಲಿದ್ದರು.
1996 ರಲ್ಲಿ ರಚನೆಯಾದ ತಾಲಿಬಾನ್ ಸರ್ಕಾರದಲ್ಲಿ ಹಸನ್ ಅಖುಂದ್‌ ಉಪ ಪ್ರಧಾನಿ ಹಾಗೂ ವಿದೇಶಾಂಗ ಸಚಿವನಾಗಿ ಸೇವೆ ಸಲ್ಲಿಸಿದ್ದ. ಕಂದಹಾರ್ ಮೂಲದ ಈತ ಇಸ್ಲಾಂ ಪಂಡಿತನಾಗಿದ್ದು, ಪಾಕಿಸ್ತಾನದ ಮದರಸಾಗಳಲ್ಲಿ ಕಲಿತು ಬಂದ ಹಿನ್ನಲೆ ಹೊಂದಿದ್ದಾನೆ. ಅಂತರರಾಷ್ಟ್ರೀಯ ಸಂಬಂಧಗಳು ಈತನಿಗೆ ಗೊತ್ತಿಲ್ಲ. ಹೀಗಾಗಿ ಈತ ಉತ್ಸವ ಮೂರ್ತಿಯಾಗುವ ಸಾಧ್ಯತೆಗಳೇ ಹೆಚ್ಚಿದೆ.
ಇನ್ನು ಹಸನ್ ಅಖುಂದ್‌ ಗೆ ಪಾಕಿಸ್ತಾನವೇ ಮುಂದೆ ನಿಂತು ಪಟ್ಟಾಭಿಷೇಕ ಮಾಡಿದ್ದು, ಮುಲ್ಲಾ ಅಬ್ದುಲ್ ಘನಿ ಬರದಾರ್, ಸಿರಾಜುದ್ದೀನ್ ಹಕ್ಕಾನಿ, ಮುಲ್ಲಾ ಯಾಕೂಬ್ ಗೆ ಅಧಿಕಾರ ಸಿಕ್ರೆ ಪಾಕಿಸ್ತಾನಕ್ಕೆ ಸಮಸ್ಯೆಯಾಗುತ್ತದೆ. ಈ ಮೂವರು ಪಾಕಿಸ್ತಾನದ ಬಗ್ಗೆ ಸಾಫ್ಟ್ ಕಾರ್ನರ್ ಹೊಂದಿಲ್ಲ.
ಆದರೆ ಹಸನ್ ಅಖುಂದ್‌ ಹಾಗಲ್ಲ ಐಎಸ್ಐ ಜೊತೆ ನಂಟು ಹೊಂದಿರುವ ಕಾರಣ ಪಾಕಿಸ್ತಾನದ ತಾಳಕ್ಕೆ ತಕ್ಕಂತೆ ಈತ ಕುಣಿಯುತ್ತಾನೆ.ಇನ್ನು ಈ ಆಯ್ಕೆ ದೋಹಾ ತಂಡದ ಅಸಮಾಧಾನಕ್ಕೆ ಕಾರಣವಾಗಿದ್ದು, ಮುಂದೆ ಬಂಡಾಯ ಎದ್ದೇಳುವುದರಲ್ಲಿ ಸಂಶಯವಿಲ್ಲ.
ನಮ್ಮಲ್ಲಿ ಬಂಡಾಯವೆದ್ರೆ ಹೋಟೆಲ್, ರೆಸಾರ್ಟ್ ಎಂದು ಹೋಗ್ತಾರೆ, ಅಫ್ಘಾನ್ ನಲ್ಲಿ ಹಾಗಲ್ಲ, ಬಂಡಾಯ ಅಂದ್ರೆ ಅಲ್ಲಿ ಸದ್ದು ಮಾಡುವುದು ಗನ್ ಮಾತ್ರ.
Discussion about this post