Advertisements

ದೇವರ ಅಂಗರಕ್ಷಕನ ಅಸಲಿ ಕಥೆಯೇನು ಗೊತ್ತಾ…?

ಕಳೆದ ಕೆಲ‌ ದಿನಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಇದೊಂದು ಚಿತ್ರ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು, ಹಾಲಿವುಡ್, ಬಾಲಿವುಡ್ ಹೀರೋಗಳಿಗೆ ಅವರನ್ನು ಹೋಲಿಕೆ ಮಾಡಲಾಗಿತ್ತು. ಪುರಿ ಜಗನ್ನಾಥ ದೇವಸ್ಥಾನ ಆವರಣದಲ್ಲಿ ಕ್ಲಿಕಿಸಿದ ಚಿತ್ರ ಸಾಮಾಜಿಕ ಜಾಲತಾಣದಲ್ಲಿ ಸಂಚಲ ಮೂಡಿಸಿದ್ದು ಸುಳ್ಳಲ್ಲ.

ಹಾಗಾದರೆ ಚಿತ್ರ ಅಸಲಿ ಕಥೆಯೇನು ಎಂದು ಒರಿಸ್ಸಾ ಮೂಲದ ಪತ್ರಿಕೆಗಳನ್ನು ಜಾಲಾಡಿದರೆ ಸಿಕ್ಕಿದ್ದು ಅದ್ಭುತ ವಿವರಗಳು. ಅದನ್ನು ಕನ್ನಡಿಗರಿಗೆ ತಲುಪಿಸಬೇಕು ಅನ್ನುವ ಕಾರಣದಿಂದ ನಾವು ಲೇಖನ ಪ್ರಕಟಿಸುತ್ತಿದ್ದೇವೆ.

ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಚಿತ್ರ ಅನಿಲ್ ಗೊಚಿಂಕರ್ ಅನ್ನುವವರದ್ದು. ದೇವರ ದೇವರು ಅಂದ್ರೆ lord of the lords  ಎಂದೇ ಕರೆಸಿಕೊಂಡಿರುವ ಪುರಿ ಜಗನ್ನಾಥನ ಊರಿನ ಅನಿಲ್ ಗೊಚಿಂಕರ್ ಪುರಿ ಜಗನ್ನಾಥ ದೇವಾಲಯದಲ್ಲಿ ‘ದಳಪತಿ’ಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಅಂದರೆ ದೇವರಿಗೆ ಅಂಗರಕ್ಷಕನಾಗಿ ಕಾರ್ಯ ನಿರ್ವಹಿಸುವುದು. ಪ್ರಮುಖವಾಗಿ ವಿಶ್ವಪ್ರಸಿದ್ಧ ಪುರಿ ರಥಯಾತ್ರೆ ನಡೆಯುವ ಸಂದರ್ಭದಲ್ಲಿ ಇವರ ಕಾರ್ಯ ಮಹತ್ತರವಾದದ್ದು.

ಹಾಗಾದರೆ ಇವರು ಕೇವಲ ದಳಪತಿಯೇ ಖಂಡಿತಾ ಅಲ್ಲ. ಇವರೊಬ್ಬ ಬಾಡಿಬಿಲ್ಡರ್ ಆಗಿದ್ದು, ಓರಿಸ್ಸಾದ ರಾಜ್ಯ ಮಟ್ಟದ ದೇಹದಾರ್ಡ್ಯ ಸ್ಪರ್ಧೆಯಲ್ಲಿ ಜಯಗಳಿಸಿ 2012 ರ ಮಿಸ್ಟರ್ ಓರಿಸ್ಸಾ ಕಿರೀಟವನ್ನು ತಮ್ಮದಾಗಿಸಿಕೊಂಡಿದ್ದಾರೆ. ನಂತರ 2016 ರಲ್ಲಿ ನಡೆದ ದೇಹದಾರ್ಡ್ಯ ಸ್ಪರ್ಧೆಯಲ್ಲಿ ಗೆಲ್ಲುವ ಮೂಲಕ ಮಿಸ್ಟರ್ ಅಂತರಾಷ್ಟ್ರೀಯ ಭಾರತೀಯ ಕಿರೀಟವನ್ನೂ ಸಹ ಇವರು ಮುಡಿಗೇರಿಸಿಕೊಂಡಿದ್ದರು.

ವೃತ್ತಿಯಲ್ಲಿ ವಕೀಲರಾಗಿರುವ ಅನಿಲ್ ಗೊಚಿಂಕರ್ ತಮ್ಮ 30 ನೇ ವಯಸ್ಸಿನಲ್ಲಿ ದೇಹದಾರ್ಡ್ಯ ಸ್ಪರ್ಧೆಗಾಗಿ ತಮ್ಮ ದೇಹವನ್ನು ಹುರಿಗೊಳಿಸಲಾರಂಭಿಸಿದ್ದಾರೆ. ಜೊತೆಗೆ ಪುರಿ ಜಿಲ್ಲೆಯಲ್ಲಿ ತಮ್ಮದೇ ಮಾಲೀಕತ್ವದ ಜಿಮ್ ಒಂದನ್ನು ನಡೆಸುತ್ತಿದ್ದಾರೆ.

ಮತ್ತೊಂದು ವಿಶೇಷ ಅಂದ್ರೆ ಕೇವಲ ಸಸ್ಯಹಾರಿಯಾಗಿದ್ದುಕೊಂಡು,ಸಸ್ಯಹಾರದ ಮೂಲಕವೇ ತಮ್ಮ ದೇಹವನ್ನು ಈ ಮಟ್ಟಕ್ಕೆ ಬೆಳೆಸಿರುವುದು. ಕರ್ನಾಟಕದಲ್ಲೂ ಸಸ್ಯಹಾರದಿಂದ ದೇಹ ಹುರಿಗೊಳಿಸಿ ಬಹುಮಾನ ಗೆದ್ದ ದೇಹದಾರ್ಡ್ಯ ಪಟುಗಳಿದ್ದಾರೆ ಅನ್ನುವುದು ಗಮನಾರ್ಹ ಅಂಶ.

ಅನಿಲ್ ಅವರ ಕುಟುಂಬ ಈ ಹಿಂದಿನಿಂದಲೂ ಪುರಿ ಜಗನ್ನಾಥನ ದೇವಾಲಯದ ಸೇವಾ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದೆ. ಹೀಗಾಗಿ ವಂಶ ಪಾರಂಪರ್ಯವಾಗಿ ಬಂದ ಕಾರ್ಯವನ್ನು ಅನಿಲ್ ನಿಭಾಯಿಸಿಕೊಂಡು ಹೋಗುತ್ತಿದ್ದಾರೆ.

ಕಳೆದ ಹಲವು ವರ್ಷಗಳಿಂದ ಇವರು ಸೇವೆ ಸಲ್ಲಿಸುತ್ತಿದ್ದರೂ ಇತ್ತೀಚೆಗೆ ನಡೆದ ರಥಯಾತ್ರೆ ಸಂದರ್ಭದಲ್ಲಿ ಛಾಯಾಗ್ರಾಹಕರೊಬ್ಬರ ಕಣ್ಣಿಗೆ ಇವರ ಕಟ್ಟು ಮಸ್ತಾದ ದೇಹ ಕಣ್ಣಿಗೆ ಬಿದ್ದಿದೆ. ಅವರು ಕ್ಲಿಕಿಸಿದ ಫೋಟೋ ಇದೀಗ ವೈರಲ್ ಆಗಿದೆ.

ಇನ್ನು ಅನಿಲ್ ಅವರ ಸಹೋದರ ದಾಮೋದರ್ ಗೊಚಿಂಕರ್ ಕೂಡಾ ಬಾಡಿ ಬಿಲ್ಡರ್ ಆಗಿದ್ದು, ರಾಷ್ಟ್ರೀಯ ಮಟ್ಟದ ಸ್ಪರ್ಧೆಗಳಲ್ಲಿ ಚಿನ್ನದ ಪದಕವನ್ನು ಕೊರಳಿಗೇರಿಸಿಕೊಂಡಿದ್ದಾರೆ. ಆದರೆ ಕೆಲ ವರ್ಷಗಳ ಹಿಂದೆ ದಾಮೋದರ್ ಬಾಡಿಬಿಲ್ಡರ್ ಕಣದಿಂದ ಹಿಂದೆ ಸರಿದಿದ್ದಾರೆ.

2006ರಲ್ಲಿ ತಂದೆಯ ನಿಧನ ನಂತರ, ಕುಟುಂಬದ ವ್ಯವಹಾರ ಮತ್ತು ಪುರಿ ಜಗನ್ನಾಥನ ದೇವಾಲಯದ ಸೇವೆ ಮುಂದುವರಿಸಿಕೊಂಡು ಹೋಗಬೇಕಾಗಿದ್ದು ಇದಕ್ಕೆ ಕಾರಣವಂತೆ.

ಇದೀಗ ಅನಿಲ್ ಮತ್ತು ದಾಮೋದರ್ ತಂದೆ ನಡೆಸುತ್ತಿದ್ದ ಹೊಟೇಲ್ ಗೊಚಿಂಕರ್ ಅನ್ನು ನಡೆಸಿಕೊಂಡು ಹೋಗುತ್ತಿದ್ದಾರೆ. ಜೊತೆಗೆ 2010ರಲ್ಲಿ ಹೋಟೆಲ್ ಇರುವ ಕಟ್ಟಡದಲ್ಲೇ ‘ಗೊಚಿಂಕರ್ ಲೈಫ್ ಸ್ಟೈಲ್ ಜಿಮ್’ ಅನ್ನು ಪ್ರಾರಂಭಿಸಿರುವ ಸಹೋದರರು ಉತ್ತಮ ದೇಹದಾರ್ಢ್ಯ ಪಟುಗಳನ್ನು ಹೊರ ತರುವ ಕಾರ್ಯದಲ್ಲಿ ನಿರತರಾಗಿದ್ದಾರೆ.

ತಮ್ಮ ಈ ಸಾಧನೆಗೆ ಸಹೋದರನೆ ಪ್ರೇರಣೆ ಅನ್ನುವ ಅನಿಲ್ ಮುಂದಿನ ದಿನಗಳಲ್ಲಿ ಮತ್ತಷ್ಟು ಸಾಧಿಸಬೇಕು ಅನ್ನುವ ಛಲ ಹೊಂದಿದ್ದಾರೆ.

Advertisements

Leave a Reply

%d bloggers like this: