Advertisements

ಸೆಲ್ಯೂಟ್ ಸರ್ – ನೀರಿನಲ್ಲಿ ಮುಳುಗಬೇಕಿದ್ದ ಗರ್ಭಿಣಿಯನ್ನು ರಕ್ಷಿಸಿದ ನೌಕಾದಳದ ಯೋಧರು

ದೇವರನಾಡಿನಲ್ಲಿ ವರುಣದೇವ ಮತ್ತು ಜಲದೇವತೆಯ ಆಟ ನಡೆಯುತ್ತಿದೆ. ನಾವೇನು ಮಾಡಿದೆವು ಎಂದು ಜನ ಕಣ್ಣೀರು ಹಾಕುತ್ತಿದ್ದಾರೆ. ಆದರೆ ಕಾಪಾಡಬೇಕಾದ ದೇವರೇ ಸೈಲೆಂಟ್ ಆಗಿದ್ದಾನೆಯೇ ಖಂಡಿತಾ ಇಲ್ಲ.

ದೇವರ ಸ್ವರೂಪ ಅನ್ನುವಂತೆ ನಮ್ಮ ದೇಶದ ಯೋಧರು ಜನತೆ ರಕ್ಷಣೆಯಲ್ಲಿ ತೊಡಗಿದ್ದಾರೆ. ಜನರನ್ನು ರಕ್ಷಿಸಬೇಕಾದ ಎಲ್ಲಾ ವ್ಯವಸ್ಥೆಗಳು ಯೋಧರ ಕೈಯಲ್ಲಿದೆ, ಸಮಯವೊಂದನ್ನು ಬಿಟ್ಟು. ಸಂಕಷ್ಟದಲ್ಲಿರುವ ಜನತೆಯ ಕರೆ ನೆರೆಯಂತೆ ನುಗ್ಗಿ ಬರುತ್ತಿದೆ. ರಾತ್ರಿ ಹಗಲು ಅಲ್ಲದೆ ಹೆಲಿಕಾಫ್ಟರ್ ನಲ್ಲಿ ಜನರನ್ನು ರಕ್ಷಿಸುವ ಕಾರ್ಯ ಭರದಿಂದ ಸಾಗುತ್ತಿದೆ.

ಅದರಲ್ಲೂ ಗರ್ಭಿಣಿಯೊಬ್ಬಳನ್ನು ರಕ್ಷಿಸಿದ ಕಥೆ ಮೈ ರೋಮಾಂಚನಗೊಳಿಸುತ್ತದೆ.

ಶುಕ್ರವಾರ ಮುಂಜಾನೆ ಕಮಾಂಡರ್ ವಿಜಯ್ ವರ್ಮ ಅವರಿಗೆ ಬಂದ ಕರೆಯೊಂದಕ್ಕೆ ತುರ್ತಾಗಿ ಸ್ಪಂದಿಸಬೇಕು ಅನ್ನಿಸಿತು. ಯಾಕೆಂದರೆ ನೀರಿನಲ್ಲಿ ಸಿಲುಕಿದ್ದು ತುಂಬು ಗರ್ಭಿಣಿ. ಹೀಗಾಗಿ ತಡ ಮಾಡಲಿಲ್ಲ. ತನ್ನ ಸಹೋದ್ಯೋಗಿಗಳೊಂದಿಗೆ ಗರ್ಭಿಣಿ ಇದ್ದ ಎರ್ನಾಕುಲಂ ಜಿಲ್ಲೆಯ ‘ಅಲ್ವ’ ಅನ್ನುವ ಗ್ರಾಮಕ್ಕೆ ತಲುಪಿದರು. ಸ್ಥಳಕ್ಕೆ 8 ಗಂಟೆಯ ಹೊತ್ತಿಗೆ ತಲುಪಿದರೂ ಪರಿಸ್ಥಿತಿ ಏರ್ ಲಿಫ್ಟ್ ಮಾಡುವುದಕ್ಕೆ ಪೂರಕವಾಗಿರಲಿಲ್ಲ. ಹೀಗಾಗಿ ಒಂದಿಷ್ಟು ಹೊತ್ತು ಕಾದರು.

ಹೆಲಿಕಾಫ್ಟರ್ ನಲ್ಲಿದ್ದ ನೌಕಾ ದಳದ ವೈದ್ಯರು ಕೆಳಗಿಳಿದು 25 ವರ್ಷದ ಗರ್ಭಿಣಿ ಸಜಿತಾ ಜಬೀಲ್ ಆರೋಗ್ಯ ತಪಾಸಣೆ ನಡೆಸಿದರು. ತುಂಬಾ ಹೊತ್ತುವುದು ಸರಿಯಲ್ಲ ಎಂದು ವಿಜಯ್ ವರ್ಮ ಅವರಿಗೆ ತಿಳಿಸಿದರು.

ತಕ್ಷಣ ಏರ್ ಲಿಫ್ಟ್ ಗೆ ವ್ಯವಸ್ಥೆ ಮಾಡಿದ ತಕ್ಷಣ ಅವರನ್ನು ಮೇಲಕ್ಕೆ ಎಳೆದುಕೊಳ್ಳಲಾಯ್ತು. ತಡ ಮಾಡದೆ ಕೊಚ್ಚಿಯಲ್ಲಿರುವ INHS Sanjivani ಆಸ್ಪತ್ರೆಗೆ ದಾಖಲಿಸಲಾಯ್ತು.

ಸಜಿತಾ ಜಬೀಲ್ ಅವರನ್ನು ಆಸ್ಪತ್ರೆ ಸೇರಿಸಿದ ಕಮಾಂಡರ್ ವಿಜಯ್ ವರ್ಮ ತಂಡ ಮತ್ತೆ ರಕ್ಷಣಾ ಕಾರ್ಯಾಚರಣೆಗೆ ಹಿಂತಿರುಗಿತ್ತು. ಆದರೆ 2 ಗಂಟೆಯ ಹೊತ್ತಿಗೆ ಸಜಿತಾ ಜಬೀಲ್ ಗಂಡು ಮಗುವೊಂದಕ್ಕೆ ಜನ್ಮ ನೀಡಿದ್ದಾರೆ.

ವಿಜಯ್ ವರ್ಮ ಸಕಾಲಕ್ಕೆ ರಕ್ಷಣಾ ಕಾರ್ಯಾಚರಣೆಗೆ ತೆರಳದಿದ್ದರೆ ಏನಾಗುತ್ತಿತ್ತು ಊಹಿಸಲು ಅಸಾಧ್ಯ.

ಸೈನಿಕರು ಸೇನೆಗೆ ಸೇರುವುದು ದೇಶಪ್ರೇಮದಿಂದ ಅಲ್ಲ ಬಡತನದಿಂದಾಗಿ ಎಂದು ಯಾವನೋ ಒಬ್ಬ ಹಿಂದೆ ಹೇಳಿದ್ದ ಮಾತು ನೆನಪಿಗೆ ಬಂತು. ಹಾಗೇ ಹೇಳಿದ ಪುಣ್ಯಾತ್ಮನಿಗೆ ಈ ಸುದ್ದಿ ತಲುಪುವಂತೆ ಮಾಡಿ.

Advertisements

One Comment on “ಸೆಲ್ಯೂಟ್ ಸರ್ – ನೀರಿನಲ್ಲಿ ಮುಳುಗಬೇಕಿದ್ದ ಗರ್ಭಿಣಿಯನ್ನು ರಕ್ಷಿಸಿದ ನೌಕಾದಳದ ಯೋಧರು

Leave a Reply

%d bloggers like this: